قصيدة رائعة للشاعر و الجار و الأخ الكبير محمد اسماعيل المقت
وله قصيدة أيضاً يخطر لي أن أشارككم بها :
كرمالا قلبي مرهون كرمالا ... مش راضي وحدة بهالكون بدالا
كرمالا غنّيت أشعار ... ذايب والفكر محتار
واللي مزوّد ناري نار دلالا
بتعرف هالقلب بحبّا محرّق ملذوع
وبتعرف عيني بعدا بتفيض دموع
وبتعرف انّي مسكين ... وبتعرف ذايب حنين
وبتدلل بالبسمات عالموجوع
مع إنو قلبي المنضام من جالا
يوم انها تميل قبالي بأحلى ملبوس
بتخايل شخصا الغالي بجنبي عروس
من صدري بزفر نهدات ... بترجمها بيوت وردّات
وبجرّ عليها بألحان شعر القوس
وبغنّي لأهل الذوق موالا
بغنّي الموال وبسهر عتمات الليل
بنظم أقوال وبوصف رمشا الكحيل
مطعون بنبلات اهداب ... شرياني الخافق منصاب
نازف جرحي وعالهجران شكّل سيل
وعلاج صوابي مقرون بوصالا
علاج صوابي ودوايي وختم الجروح
لو شوفا صوبي جايي والوجه صبوح
ونكمّل أحلى مشوار ... والفل يفتّح والغار
وزهر الجوري والياسمين عطرو يفوح
وتهلّ عليي ايات جمالا
لوحة أسرار الّدنيا بريشة فنّان
روضة أزهار قرنفل هيل وريحان
مجنون بحبا مجنون ... ضيعني بحر العيون
تاه المركب بالأمواج والربان
ضحّى بروحو والأنفاس كرمالا