قـصيـدة للـمغـتـربـيـن ...
بقلم : القاسم علي خليل
.
.
.
.
يا مهاجرين ارجعوا طال التجافي طال
يا خوف قلبي على الهجران تعتادوا
الأب اللي بربي ولادوا ان طولو الترحال
سودّة بعيونو الدني ت يشوفهن عادوا
يعقوب بغياب يوسف عزّ عمرو مال
وقطّب جفونو العتم والدمع شو فادو
وساعة ماشم الآثر فتح عيونو وقال
الله لا يحـرم حدا من شوفة ولادوا
وجنح السنونو رغم ما بيعشق التجوال
بيرجع لأرضو قدر ما طول بعادو
وطير الحمام حمل ع جوانحو مرسال
بعود حامل غصن أخضر بمنقادو
حصّة السبع بعرينو مونة الأشبال
ان فارق عرينو بجوز الجوع يصطادو
والحجر في مطرحو قنطار بالمكيال
والسيف ما بيحفظو غير حضنة غمادو
ياغايبين الـوطن مابينشرى بالـمال
ولا في مهاجر جنا من المال اسعادو
اللي بعيش بين السواقي بفية العرزال
بخيمة عتيقة بين أهلو وأحفـادوا
بيغفى على كم الحبق والفل والوزّال
قصرو غصون الشجر والورد سجادو
بيوعى على لحن النسيم ونغمة الشلال
وكل طير يعزف نغم من فيض إنشادو
هـّيدا بعيش العمر رايق وفاضي البال
ببيع كل الدني بضيعة من بلادو
ياغايبين الـوطن دستور للأجيال
وتاريخ خلد بطـولاتـوا وأمجادو
هل وطن لمّا على ارضو زحفة الأبطال
في قلب واحد تحدو الشر وعنادو
من صخور شهبا سطع لتدمر المشعال
ومن كل قلعة النصر زغرد لروادوا
وبساحة الشهدا ارتفع بيرق الإستقلال
والشيخ شارك جبل قاسيون بأعيادو
يا غايبين ارجعو طال التجافي طال
ياخوف قلبي على الهجران تعتادوا
يا غايبين ارجعو حب الوطن قتّال
الله لا يحرم وطن حنيّة ولادوا
.
.
.
منقول